اسلام آباد: وفاقی دارالحکومت میں یوم آزادی کیلئے اسلام آباد پولیس نے سکیورٹی انتظامات مکمل کرلئے۔کسی مقام پر ہلڑ بازی اورقانون کی خلاف ورزی کسی صورت برداشت نہیں کی جائے گی۔
ترجمان اسلام آباد پولیس کے مطابق 1500 سے زائد پولیس افسران واہلکار سکیورٹی کے فرائض سرانجام دیں گے، ٹریفک کیلئے الگ سے 550 افسران واہلکار ڈیوٹی کے فرائض سرانجام دیں گے۔
ون ویلنگ کی روک تھام کے لیے خصوصی پکٹس لگائی گئی ہیں، پارکوں اور پبلک مقامات پربھی خصوصی نفری تعینات، تھانوں کی موبائل گشت،سی ٹی ڈی کمانڈوز اورڈولفن فورس کے خصوصی سکواڈ گشت پر تعینات ہونگے۔
ترجمان کے مطابق ون ویلنگ اور اس مقصد کے موٹرسائیکل تیار کرنے والی ورکشاپس کے خلاف بھی کارروائی کی جا رہی ہے، کسی مقام پر ہلڑ بازی اورقانون کی خلاف ورزی کسی صورت برداشت نہیں کی جائے گی، یوم آزادی کے موقعہ پر قانون شکن عناصر کے خلاف موثر کریک ڈاؤن کیا جائیگا۔
