پاکستان اور امریکا کے درمیان معاشی روابط کے فروغ کی کوششیں جاری ہیں، اور اس سلسلے میں پاکستانی سفیر رضوان سعید شیخ نے 15 تا 17 ستمبر نیویارک کا تین روزہ دورہ کیا۔ دورے کا مقصد پاکستان کی ٹیکسٹائل برآمدات کو فروغ دینا اور امریکی منڈی سے روابط مضبوط بنانا تھا۔
اس دوران پاکستانی وفد میں وزیر تجارت و سرمایہ کاری محمد حنیف چنا بھی شامل تھے۔ سفیر نے گُل احمد، النصرت ملز، الکرم، لکی ٹیکسٹائل سمیت دیگر کمپنیوں کے نمائندوں سے ملاقاتیں کیں، اور امریکی امپورٹرز، سورسنگ ایجنٹس اور تجارتی اداروں کے ساتھ بھی تفصیلی گفتگو کی۔
ملاقاتوں میں پاکستان کی انڈسٹریل صلاحیت اور ہوم ٹیکسٹائل میں مسابقتی برتری پر زور دیا گیا۔ سفیر رضوان سعید شیخ نے کہا کہ حالیہ عالمی تجارتی تبدیلیوں سے پاکستان فائدہ اٹھا سکتا ہے، اور یہ پاکستان کے لیے ایک اہم موقع ہے۔
اس دوران برآمدکنندگان نے سفیر کو توانائی لاگت اور ورکنگ کیپیٹل جیسے مسائل پر بریف کیا، جنہیں حل کرنے کی ضرورت ہے تاکہ پاکستان کی ٹیکسٹائل صنعت مزید مستحکم ہو اور عالمی منڈیوں میں اپنی پوزیشن مضبوط کر سکے۔
