لاہور: چیئرمین پی ٹی آئی کے خلاف دہشتگردی کے مزید 3 مقدمات درج، عمران خان جناح ہاوس پرحملہ سمیت دہشتگردی کے مزید 3 مقدمات میں نامزد کر دئیے گئے۔
پولیس ذرائع کے مطابق عمران خان کو دہشت گردی کے مزید 3 مقدمات میں نامزد کر دیا گیا ہے،چیئرمین پی ٹی آئی کو جناح ہاؤس حملہ اور عسکری ٹاور حملے کے مقدمے میں نامزد کیا گیا ہے۔
مزکورہ 2 مقدمات کے علاوہ سابق وزیراعظم عمران خان کو ماڈل ٹاؤن وزیر اعظم سیکرٹریٹ پرحملے کے مقدمے میں بھی نامزد کردیا گیا۔
پولیس کاکہنا ہے کہ لاہور میں چیئرمین پی ٹی آئی کے خلاف دہشت گردی دفعات کے تحت 7 مقدمات درج تھے اور اب مزید مقدمات میں نامزدگی کے بعد چیئرمین پی ٹی آئی کے خلاف دہشتگردی کے مقدمات کی تعداد10ہوگئی۔
بتایا گیا کہ انویسٹی گیشن کے بعد لاہورمیں دہشتگردی کے 3 مقدمات میں چیئرمین پی ٹی آئی کو نامزد کیاگیا، گرفتار ملزمان کے بیانات کی روشنی میں انہیں نامزد کیا گیا۔
عمران خان پر 9 مئی واقعات پرپنجاب کےدیگراضلاع میں دہشتگردی کے 19 مقدمات ہیں، چیئرمین پی ٹی آئی کو ملتان کے 3، راولپنڈی کے 2 مقدمات میں نامزد کیا گیا جبکہ فیصل آباد کے 2، گوجرانوالا اور میانوالی میں ایک ایک دہشتگردی کے مقدمے میں نامزد ہیں۔
خیال رہے کہ رواں سال 9 مئی کو پاکستان تحریک انصاف کے چیئرمین عمران خان کی گرفتاری کے بعد پی ٹی آئی کارکنوں نے ملک کے مختلف شہروں میں احتجاج اور جلاؤ گھیراؤ کیا تھا۔
