ٹائی ٹینک کی باقیات دیکھنے کے لئے جانے والے پاکستانی باپ بیٹاکون ہیں

بحراوقیانوس میں دنیا کی امیر ترین شخصیات کو ٹائی ٹینک کی باقیات دیکھانے کے لیے لے جانے والی لاپتا آبدوز ٹائٹن میں مجموعی طور پر 5 سیاح ہیں جن میں معروف پاکستانی تاجر شہزادہ داؤد اور ان کے بیٹے سلیمان داؤد بھی شامل ہیں۔

دنیا بھر میں آبدوز میں سوار ہو کر ٹائی ٹینک کی باقیات دیکھنے کے لیے جانے والی شخصیات بھی زیر بحث ہیں۔ کیا آپ پاکستانی تاجر شہزادہ داوٴد اور ان کے بیٹے سیلمان داوٴد کے بارے میں جانتے ہیں جو لاپتا آبدوز ٹائٹن میں سوار ہیں۔

شہزادہ داوٴد پاکستان کے امیر ترین شخصیات میں سے ایک ہیں۔ وہ اینگرو کارپوریشن کے وائس چیئرمین بھی ہیں۔ کراچی میں واقع یہ کمپنی متعدد شعبوں میں کام کرتی ہے جس میں کھاد، خوراک اور توانائی کی پیداوار ہے۔

48 سالہ شہزادہ داوٴد نے بکنگھم یونیورسٹی میں تعلیم حاصل کی، جہاں انہوں نے ایل ایل بی کیا۔ انہوں نے عالمی ٹیکسٹائل مارکیٹنگ میں فلاڈیلفیا یونیورسٹی سے تعلیم بھی حاصل کی۔

رپورٹس کے مطابق، شہزادہ داوٴد کی کل دولت اس وقت 136.73 ملین امریکی ڈالر ہے۔

ڈیلی میل کی رپورٹ کے مطابق شہزادہ داوٴد کا 19 سالہ بیٹا سلیمان داوٴد بھی آبدوز میں سوار ہے۔ مختلف رپورٹس کے مطابق شہزادہ داوٴد کا بیٹا سائنس فکشن کا پرستار اور والی بال کی وجہ سے مشہور ہے۔

شہزادہ داوٴد اور ان کا 19 سالہ بیٹا 18 جون کو ٹائٹینک جہاز کا ملبہ دیکھنے کے لیے آبدوز پر سوار ہوئے۔ تاہم آبدوز کے لاپتا ہونے کے بعد سے ان دونوں سے کوئی رابطہ نہیں ہوا ہے۔