چین کی طرف سے احسن اقبال کو سی پیک کے ہیرو کا خطاب ملنے پر مبارک ہو،مریم اورنگزیب

اسلام آباد: وفاقی وزیر اطلاعات مریم اورنگزیب نے وفاقی وزیر منصوبہ بندی احسن اقبال کو چین کی طرف سے سی پیک کے ہیرو کا خطاب ملنے پر مبارک دیتے ہوئے کہا ہے کہ چین کا بیان تمام سیاہ کرداروں کے منہ پر طمانچہ ہے۔

اپنے ایک بیان میں مریم اورنگزیب نے کہا ہے کہ جس شخص کی ایمانداری، محنت اور لگن کا اعتراف چین جیسا عظیم ملک کر رہا ہے اسے سیاسی انتقام میں پاگل ہو کر جیل میں ڈالا گیا۔

انہوں نے کہا کہ لوگوں کو اکسا کر اور اشتعال پھیلا کر گولی مروائی گئی، جھوٹے مقدمات بنائے گئے، کردار کشی کی گئی، چین کا بیان ایسے تمام سیاہ کرداروں کے منہ پر طمانچہ ہے۔

مریم اورنگزیب نے کہا ہے کہ یہ اعزاز پاکستان کی خارجہ پالیسی کی بہتری کا بھی اظہار ہے، چار سال میں ملک کو سفارتی تنہائی میں مبتلا کیا گیا تھا۔

وزیر اطلاعات نے کہا کہ وزیراعظم کی قیادت میں گزشتہ ایک سال کے دوران خارجہ محاذ پر پاکستان کے روابط، عزت اور ساکھ بحال ہوئی ہے۔