اسرائیلی فضائی حملے میں 10 فلسطینی شہریوں کی شہادت،پاکستان کی شدید مذمت

اسلام آباد:پاکستان کی جانب سے مقبوضہ فلسطینی علاقے جنین میں اسرائیلی فوج کے چھاپوں اور فضائی حملوں کی شدید الفاظ میں مذمت کرتے ہوئے کہا ہے کہ عالمی برادری اسرائیل کے ظالمانہ اقدامات کو رکوانےکیلئے اپنی ذمہ داری ادا کرے۔

دفتر خارجہ کی جانب سے جاری مذمتی بیان میں کہا گیا ہے کہ گزشتہ روز حملوں میں 10 فلسطینی شہید اور 50 سے زائد زخمی ہوئے، فلسطین کے عوام کیخلاف تشدد کی یہ تازہ لہر فوری ختم ہونا چاہیے۔

ترجمان دفتر خارجہ نے مزید کہا ہے کہ عالمی برادری اسرائیل کے ظالمانہ اقدامات کو رکوانے اور انسانی حقوق کے تحفظ کو یقینی بنانے کیلئے اپنی ذمہ داری ادا کرے۔

دفتر خارجہ نے کہا کہ پاکستان فلسطینی عوام کے حق خودارادیت اور جائز جدوجہد کیلئے حمایت کا اعادہ کرتا ہے، خود مختار فلسطینی ریاست کیلئے اپنے مطالبے کی تجدید کرتے ہیں۔