پاکستانی سفیر مسعود خان کی امریکی سینٹراورکانگریس اراکین سے ملاقات، پاک امریکہ تعلقات،دفاعی و سکیورٹی تعاون پر گفتگو

واشنگٹن:امریکہ میں پاکستان سفیر مسعود خان نے امریکی سینٹراورکانگریس اراکین سے ملاقات کر کے پاک امریکہ تعلقات،دفاعی و سکیورٹی تعاون پر تبادلہ خیال کیا۔

پاکستانی سفیر مسعود خان نے سینیٹر ٹوڈ ینگ، چیئرمین آرمڈ سروسز کمیٹی کانگریس مین مائیک راجرز اور کانگریس پروگریسو کاکس کی نائب صدر کانگریس وومن الہان عمر سے ملاقات کی اور پاک امریکہ تعلقات، دونوں ممالک کی اقتصادی شراکت داری، دفاعی تعلقات اور سیکیورٹی تعاون، ماحولیاتی تبدیلی اور علاقائی پیشرفت کے حوالے سے بات چیت کی۔

ملاقات کے بعد سفیر پاکستان نے اپنی ٹویٹ میں کہا کہ انڈیانا کے ایک عظیم رہنما سینیٹر ٹوڈ ینگ سے ملاقات کرکے خوشی ہوئی۔

پاک امریکہ اقتصادی شراکت داری کو مضبوط بنانے اور علاقائی سلامتی سے متعلق امور پر تبادلہ خیال کیا۔

مسعود خان نے چیئرمین آرمڈ سروسز کمیٹی کانگریس مین مائیک راجرز سے علاقائی صورتحال، دفاعی تعلقات اور سیکیورٹی تعاون پر تبادلہ خیال کیا۔ دونوں فریقوں نے روابط جاری رکھنے پر اتفاق کیا۔

پاکستانی سفیر نے رکن کانگریس الہان عمر سے ملاقات کے بعد ٹویٹ کیا کہ الہان عمر سے پاک امریکہ تعلقات، خطے میں ہونے والی پیشرفت اور موسمیاتی موافقت اور تخفیف پر بات کی۔ انہوں نے انسانی سلامتی کو فروغ دینے پر کانگریس کی خاتون رکن الہان عمر کے کام کو سراہا۔