توشہ خانہ کیس قابل سماعت قراردینے کیخلاف اپیل پرسماعت کا تحریری حکمنامہ جاری

اسلام آباد:اسلام آباد ہائیکورٹ نے توشہ خانہ کیس قابل سماعت قراردینے کیخلاف اپیل پرسماعت کا تحریری حکمنامہ جاری کر دیا۔حکمنامے میں کہا گیا ہے کہ رجسٹرار آفس تمام متعلقہ درخواستوں کو یکجا کر کے سماعت کیلئے مقرر کرے۔

چیف جسٹس عامرفاروق کی جانب سے جاری 27 جولائی کی سماعت کے تحریری حکمنامے میں کہا گیا ہے کہ درخواست گزار کے وکیل نے جج کو متعصب قرار دے کر کیس منتقل کرنے کی استدعا کی۔

ٹرائل کورٹ کے جج سے منسوب فیس بْک پوسٹیں عدالت کو دکھائی۔بتایا گیا کہ ٹرائل کورٹ کے جج نے فیس بْک پوسٹوں کو تسلیم کرنے سے انکار کیا ہے۔رجسٹرار آفس فیس بْک پوسٹوں کا معاملہ ایف آئی اے سائبر کرائم ونگ کو بھیجے۔

ایف آئی اے تحقیق کر کے آئندہ تاریخ سماعت سے پہلے اپنی رپورٹ جمع کرائے۔الیکشن کمیشن بھی اس معاملے پر آئندہ سماعت پر عدالتی معاونت کرے۔ کیس کے دائرہ اختیار سے متعلق یہ عدالتی کارروائی کا دوسرا راؤنڈ ہے۔

اسلام آباد ہائیکورٹ کیس قابلِ سماعت قرار دینے کے خلاف اپیل پہلے منظورکرتے ہوئے ٹرائل کورٹ کو دوبارہ درخواست پر فیصلے کا حکم دے چکی ہے۔