ورلڈ ایتھلیٹکس چیمپئن شپ،ارشد ندیم شرکت کیلئے ہنگری روانہ

لاہور: پاکستان کے سٹار ایتھلیٹ ارشد ندیم ورلڈ ایتھلیٹکس چیمپئن شپ میں شرکت کیلئے ہنگری روانہ ہوگئے۔قومی اتھلیٹ کا کہنا ہے کہ مکمل فٹ ہوں، اچھا پرفارم کرنے کی کوشش کروں گا۔

سٹار ایتھلیٹ ارشد ندیم کے کوچ سلمان اقبال بٹ بھی ان کے ہمراہ روانہ ہوئے ہیں۔

روانگی سے قبل ارشد ندیم نے لاہور میں آخری ٹریننگ سیشن میں بھرپور ٹریننگ کی، وہ ورلڈ ایتھلیٹکس چیمپئین شپ میں شاندار کم بیک کیلئے پر امید ہیں۔

ورلڈ ایتھلیٹکس چیمپئن شپ کے جیولن تھرو ایونٹ کا کوالیفائنگ راؤنڈ 25 اگست کو ہوگا جبکہ فائنل 27 اگست کو ہوگا۔

سٹار ایتھلیٹ ارشد ندیم کا کہنا ہے کہ مکمل فٹ ہوں، اچھا پرفارم کرنے کی کوشش کروں گا، فٹ ہونے کے بعد بھرپور ٹریننگ کی ہے ، ورلڈ ایتھلیٹکس میں نیرج چوپڑا کے ساتھ اچھا مقابلہ متوقع ہے۔