امریکا اور ایران کے درمیان قیدیوں کا تبادلہ، منجمد اثاثے بھی منتقل

تہران: امریکا اور ایران کے درمیان قیدیوں کا تبادلہ، اربوں ڈالر کے منجمد اثاثے بھی قطر کے بینک کے ذریعے منتقل کردیے گئے۔

غیر ملکی میڈیا کی رپورٹ کے مطابق قطر کی ثالثی کے بعد ایران نے اپنی حراست میں موجود 5 امریکی شہریوں کو رہا کر دیا ہے۔

معاہدے کے مطابق امریکا نے ایران کے 6 ارب ڈالرز کے منجمد اثاثوں کو بھی قطر کے ایک بینک میں منتقل کیا ہے جبکہ 5 ایرانی شہریوں کو رہا کیا گیا ہے جو قطر کے شہر دوحہ پہنچ گئے ہیں۔

ایران کی جانب سے امریکی شہریوں طیارے میں بیٹھنے کی اجازت اسی وقت ملی جب منجمد اثاثوں کی منتقلی مکمل ہوئی، جن کو پہلے مرحلے میں قطر لے جایا گیا ہے، جہاں سے انہیں واشنگٹن منتقل کیا جائے گا۔

5 میں سے 3 افراد کی شناخت سامنے آئی ہے جن میں سے ایک برطانوی نژاد امریکی شہری بھ ی موجود ہے، ابھی یہ واضح نہیں کہ اس معاہدے سے ایران اور امریکا کے درمیان سفارتی تعلقات میں بہتری آئے گی یا نہیں۔

امریکی حکومت کا کہنا ہے کہ ایران کو منتقل کی جانے والی رقم کو صرف ایسی اشیا کی خریداری کے لیے استعمال کیا جاسکے گا جن پر پابندیاں عائد نہیں۔