ایکس نے آڈیو ویڈیو کال کا ابتدائی ورژن متعارف کرا دیا

کیلیفورنیا: سماجی رابطے کے پلیٹ فارم ایکس نے آڈیو اور ویڈیو کال فیچر متعارف کرانے کا آغاز کر دیا۔

سربراہ ایکس ایلون مسک نے پلیٹ فارم پر ایک پوسٹ کو شیئر کرتے ہوئے فیچر کے متعلق اطلاع دی اور لکھا کہ ایکس پر آڈیو اور ویڈیو کال فیچر کا ابتدائی ورژن آگیا ہے۔

فیچر کے ساتھ ایکس کی جانب سے ایپ کی سیٹنگ میں ایک نیا ٹوگل بھی پیش کیا گیا ہے جس کی مدد سے فیچر کو کھولا یا بند کیے جانے کے ساتھ جن لوگوں کے ساتھ فیچر استعمال کرنا ہے ان کا تعین کیا جاسکے گا۔

ٹوگل میں پیش کیے جانے والے آپشن صارفین کو ایڈریس بک میں موجود افراد، فالو کیے جانے والے لوگ، تصدیق شدہ صارف یا تین خصوصیت بیک وقت رکھنے والوں کو کال کرنے کی سہولت دے گا۔

صارف ڈی ایم (ڈائریکٹ میسج) میں جا کر کسی دوسرے صارف کو کال کر سکتے ہیں۔ اس کے علاوہ اسکرین پر اوپر کی جانب دائیں طرف فون کے نشان کو دبا کر آڈیو یا ویڈیو کال کا انتخاب کیا جاسکتا ہے۔

تاہم فی الحال یہ فیچر صرف آئی او ایس صارفین کے لیے دستیاب ہے اور اینڈرائیڈ صارفین کےلیے اس کا اجراء جلد متوقع ہے۔ البتہ، کمپنی کی جانب سے کسی تاریخ کا اعلان نہیں کیا گیا ہے۔