دنیا بھر کے نقل مکانی کرنے والے جانوروں کا بڑاحصہ معدومیت کے خطرہ سے دوچار

ایک نئی رپورٹ میں انکشاف کیا گیا ہے کہ دنیا بھر کے نقل مکانی کرنے والے جانوروں کا 22 فی صد حصہ معدوم ہونے کے خطرے سے دوچار ہے جبکہ نصف کے برابر اقسام کی تعداد تنزلی کا شکار ہے۔ان جانوروں کو درپیش دو خطرات یعنی ان کا استحصال اور ختم ہوتے مسکن انسانی سرگرمیوں کا نتیجہ ہیں۔

ادارہ برائے تحفظِ ہجرتی و جنگلی حیات کی جانب سے نئی ’اسٹیٹ آف دی ورلڈز مائگریٹری اسپیشیز‘ رپورٹ حال ہی میں شائع کی گئی ہے۔

اقوامِ متحدہ کے ماحولیاتی پروگرام کے ایگزیکٹو ڈائریکٹر اِنگر اینڈرسن کا کہنا تھا یہ رپورٹ واضح کرتی ہے کہ غیر پائیدار انسانی سرگرمیاں ہجرتی حیوانات کے مستقبل کو نقصان پہنچا رہی ہیں۔

انہوں نے بتایا کہ یہ حیوان صرف ماحولیات کے تغیر کا اشاریہ نہیں دیتے بلکہ زمین کے ماحول کے پیچیدہ نظام کو فعال رکھنے میں اہم کردار ادا کرتی ہے۔

خیال رہے ہر سال اربوں کی تعداد میں زمینی، بحری و دریائی اور فضائی جانور نقل مکانی کرتے ہیں۔یہ جانور ملکی اور برِاعظموں کی سرحدوں کو عبور کرتے ہیں۔ جبکہ بہت سے جانور افزائشِ نسل اور غذا کی طلب میں ہزاروں کلو میٹر کا فاصلہ طے کرتے ہیں۔