‎ججز خط معاملہ،وزیراعظم اور چیف جسٹس کی آج اہم ملاقات ہوگی

‎ اسلام آباد: اسلام آبادہائی کورٹ کے ججز کے خط کے معاملے پر وزیراعظم شہباز شریف آج چیف جسٹس آف پاکستان سے ملاقات کریں گے۔

‎ذرائع کے مطابق اسلام آباد ہائی کورٹ کے ججز کے خط والے معاملے پر اہم پیشرفت ہوئی ہے اور چیف جسٹس پاکستان قاضی فائز عیسیٰ نے اسلام آباد ہائی کورٹ کے6 ججز کی طرف سے لکھے گئے خط کے حوالے سے وزیراعظم شہباز شریف سے ملاقات کے لیے پیغام بھجوایا ہے۔

‎ذرائع کا کہنا ہے کہ چیف جسٹس قاضی فائز عیسیٰ کی جانب سے پیغام آنے کے بعد وزیراعظم شہباز شریف اپنی قانونی ٹیم کے ہمراہ آج ان سے ملاقات کریں گے، یہ ملاقات آج دوپہر دو بجے سپریم کورٹ میں ہوگی جس میں وزیراعظم کے ہمراہ وزیرقانون اعظم نذیر تارڑ اور اٹارنی جنرل منصور اعوان بھی ہوں گے۔

‎ذرائع کا کہنا ہے کہ وزیراعظم کو ملاقات کا پیغام بھی اٹارنی جنرل منصور اعوان کے ذریعے بھجوایا گیا ہے۔

‎دوسری جانب وزیرقانون اعظم نذیر تارڑ نے گزشتہ روز ملاقات کی تصدیق کرتے ہوئے کہا تھاکہ وزیراعظم کل چیف جسٹس قاضی فائز عیسیٰ سے ملاقات کریں گے۔

‎ذرائع کا کہنا ہے کہ وزیراعظم اور چیف جسٹس کی ملاقات میں سپریم کورٹ کے سینئر ترین جج جسٹس منصورعلی شاہ بھی موجود ہوں گے۔