اسلام آباد،راولپنڈی سمیت مضافاتی اورسیاحتی مقامات پر بارش، موسم خوشگوار

اسلام آباد:اسلام آباد،راولپنڈی سمیت مضافاتی اورسیاحتی مقامات پر رات گئے سے بارش کاسلسلہ وقفہ وقفہ سے جاری ہے جس سے گرمی کازورٹوٹ گیاابررحمت برسنے سے موسم خوشگوار ہوگیا۔محکمہ موسمیات کاکہناہے کہ سندھ، شمال مشرقی، جنو بی بلوچستان، خیبر پختونخوا، پنجاب، خطہ پوٹھو ہار، اسلام آباد، کشمیر اور گلگت بلتستان میں بارش کاامکان ہے ۔

جڑواں شہروں راولپنڈی اسلام آباد سمیت مضافاتی اورسیاحتی مقامات مری ،نتھیاگلی ،گلیات اورآزادکشمیر کے مختلف علاقوں بارش کاسلسلہ رات سے وقفہ وقفہ سے جاری ہے ۔جس سے موسم سہانا ہوگیاہے ۔
محکمہ موسمیات کے مطابق آج سے 30 اگست کے دوران شدید ،موسلادھار بارشوں کے باعث سندھ، بلوچستان اورجنوبی پنجاب کے نشیبی علاقے زیرآب آنے کا خطرہ ہے ۔ ڈیرہ غازی خان کے پہاڑی ندی نالوں، دادو، قلات، خضدار، جعفر آباد، سبی، نصیر آباد، بارکھان، لورالائی، آواران، پنجگور، واشک، مستونگ اورلسبیلہ کے مقامی نالوں،ندی نالوں میں طغیانی کا خدشہ ہے۔

موسلا دھار بارش کے باعث مری، گلیات، مانسہرہ، کوہستان، چترال، دیر، سوات، شانگلہ، بونیر، کشمیر اور گلگت بلتستان میں لینڈ سلائیڈنگ کا خطرہ ہے۔ اسلام آباد،راولپنڈی، گوجرانوالہ، لاہور، شیخوپورہ، قصور، سیالکوٹ، سرگودھا، فیصل آباد، ملتان،ساہیوال، نوشہرہ اور پشاور کے نشیبی علاقے زیر آب آنے کا خدشہ ہے ۔

چوبیس گھنٹوں کے دوران زیادہ سے زیادہ درجہ حرارت دالبندین 43، بھکر41، ڈی آئی خان، نورپورتھل اورکوٹ ادومیں 40ڈگری سینٹی گریڈ ریکارڈ کیا گیا۔