بانی پی ٹی آئی کے سیکیورٹی انچارج کی بازیابی کے لئے درخواست دائر

اسلام آباد: پاکستان تحریک انصاف کے بانی چیئرمین عمران خان کے سیکیورٹی انچارج عمر سلطان کی بازیابی کیلیے ہائیکورٹ میں درخواست دائر کردی گئی۔

لاپتہ عمر سلطان کے والد سلطان جاوید نے اپنے وکیل قدیر جنجوعہ کی وساطت سے اسلام آباد ہائیکورٹ میں درخواست دائر کی ہے۔

درخواست میں مؤقف اختیار کیا گیا ہے کہ عمر سلطان کو اسلام آباد پولیس کی جانب سے 26 اگست کو بغیر وارنٹ سیکٹر ایف 10 میں واقع پیٹرول پمپ کے قریب سے گرفتار کیا گیا، تھانے میں عمر سلطان کی بازیابی کیلئے درخواست دی مگر کوئی ایکشن نہیں لیا گیا۔

درخواست میں استدعا کی گئی ہے کہ عمر سلطان کو عدالت کے روبرو پیش کرنے، مقدمات، نظر بندی احکامات کی تفصیلات فراہم کرنے کا حکم دیا جائے۔ عمر سلطان کی گرفتاری و اغوا کو غیر قانونی قرار دیا جائے۔

درخواست میں یہ بھی استدعا کی گئی ہے کہ عمر سلطان کو حبس بے جا میں رکھنے کیخلاف غیر جانبدار انکوائری کا حکم دیا جائے، اغواء کاروں کا تعین کرکے ملوث افسران کیخلاف کارروائی کا حکم دیا جائے۔

درخواست میں ریاست، سیکرٹری داخلہ، آئی جی اسلام آباد، ایس ایچ او تھانہ ایف 10 کو فریق بنایا گیا ہے۔