اسرائیل نے انسداد پولیو ٹیم کو غزہ میں داخل ہونے سے روک دیا

غزہ میں پولیو کا کیس سامنے آنے کے بعد عالمی اداروں نے تشویش کا اظہار کرتے ہوئے جنگ زدہ علاقوں میں پولیو مہم شروع کرنے کی ضرورت پر زور دیا تھا۔

عرب میڈیا کے مطابق عالمی اداروں کی توجہ کے باعث غزہ میں انسداد پولیو کی ٹیمیں ترتیب دیدی گئیں جو غزہ میں مختلف علاقوں میں پولیو کے قطرے پلانے پہنچی تھیں۔

عالمی ادارۂ صحت نے بتایا کہ خان یونس میں پولیو مہم کا آغاز کیا گیا لیکن کئی علاقوں میں مشکلات کا سامنا کرنا پڑ رہا ہے۔

فلسطین کے محکمۂ صحت کے ترجمان کا کہنا ہے کہ اسرائیلی فوج نے انسدادِ پولیو ٹیموں کو غزہ میں داخل ہونے کی اجازت نہیں دی اور نہ ہی ٹیموں کی حفاظت کے لیے ضروری اقدامات اُٹھائے جا رہے ہیں۔

ترجمان وزارتِ صحت نے عالمی برادری سے مطالبہ کیا کہ اسرائیلی حکام پر پولیو ٹیموں کے محفوظ داخلے کو یقینی بنانے پر زور دیا جائے۔

واضح رہے کہ غزہ میں 25 سال بعد پولیو کا پہلا کیس رپورٹ ہوا ہے جس پر 2 لاکھ سے قریب بچوں کو ویکسین پلانے کی مہم کا آغاز کیا گیا ہے۔