دوسراٹیسٹ،پاکستان کی انگلینڈ کیخلاف بیٹنگ جاری

ملتان: پاکستان کی انگلینڈ کیخلاف دوسرے ٹیسٹ میچ میں بیٹنگ جاری ہے۔

ملتان میں کرکٹ اسٹیڈیم میں کھیلے جارہے سیریز کے دوسرے ٹیسٹ میچ میں قومی ٹیم کے کپتان شان مسعود نے ٹاس جیت کر پہلے بیٹنگ کرنے کا فیصلہ کیا۔پاکستان نے 10اوورز میں 2 وکٹ کے نقصان پر 20رنز بنائے ہیں۔

ٹاس کے موقع پر گفتگو کرتے ہوئے قومی کپتان شان مسعود نے کہا ہے کہ ہم پہلی اننگز میں اچھا سکور بنانا چاہتے ہیں، سکور بورڈ پر بڑا سکور لگا کر دباوٴ بڑھانے کی کوشش کریں گے۔

انہوں نے مزید کہا ہے کہ پاکستان کیلئے کھیلنا اعزاز ہے، ٹیسٹ میں جیت کیلئے 20 وکٹیں لینی ہوتی ہیں، ہم سب بہت زیادہ پرجوش ہیں، بابراعظم، شاہین آفریدی اور نسیم شاہ کو آرام دیا گیا ہے لیکن ہمارے پاس اچھے سپنرز ہیں۔

اس موقع پر انگلش ٹیم کے کپتان بین سٹوکس نے کہا ہے کہ ٹاس جیتتے تو بیٹنگ ہی کرتے، پہلے ٹیسٹ میں اچھی کامیابی ملی، پہلے ٹیسٹ میں کامیابی کے بعد ٹیم کا مورال بلند ہے، دوسرا ٹیسٹ بھی جیت کر سیریز اپنے نام کرنا چاہتے ہیں۔

دوسرے ٹیسٹ میچ میں پاکستان کی پلیئنگ الیون میں ایک کھلاڑی کا ڈیبیو ہوا ہے جبکہ تین سپنرز شامل کیے گئے ہیں، دوسرے ٹیسٹ کے لیے اعلان کردہ ٹیم میں نعمان علی، ساجد خان اور زاہد محمود کو ٹیم کا حصہ بنایا گیا ہے۔

علاوہ ازیں عامر جمال، صائم ایوب، عبداللہ شفیق، شان مسعود، سعود شکیل، محمد رضوان، سلمان علی آغا پلیئنگ الیون کا حصہ ہیں، ٹیم میں کامران غلام کو بھی شامل کیا گیا ہے جو انگلینڈ کے خلاف ڈیبیو ٹیسٹ کھیل رہے ہیں۔

انگلش ٹیم میں کپتان بین سٹوکس کی واپسی ہوئی ہے، بقیہ کھلاڑیوں میں زیک کرولی، بین ڈکٹ، اولی پوپ، جو روٹ، ہیری بروک، جیمی سمیتھ، برائیڈن کارس، میٹ پوسٹ، جیک لیچ اور شعیب بشیر شامل ہیں۔