پاکستان کی پہلی خاتون میچ ریفری ویمنز سپر لیگ میچز کیلئے نظر انداز

پاکستان سپر لیگ کے ساتھ ہونے والے خواتین کے دو نمائشی میچوں میں خواتین امپائروں کو تو موقع مل رہا ہے لیکن پاکستان کرکٹ بورڈ نے پہلی اور واحد خاتون میچ ریفری کو نظر انداز کردیا۔ اگر ان میچز میں ان کو ذمہ داری دی جاتی تو اس سے خاتون میچ ریفری کو اس سطح کے میچ سےتجربہ ملتا۔ ثمن ذوالفقار کو پاکستان کرکٹ بورڈ نے 2020 میں میچ آفیشلز کے ڈویلپمنٹ پینل میں شامل کیا تھا ۔ ثمن ذوالفقار ڈومیسٹک کی سطح پر ویمن میچز سپروائز کر رہی ہیں لیکن پہلی مرتبہ پاکستان سپر لیگ کے ساتھ ہونے والے نمائشی ویمن میچز سے انہیں نظر انداز کر دیا گیا ہے ۔ پنڈی میں ہونے والے میچوں میں ویمن لیگ کے میچز میں 2 خواتین امپائرز سلیمہ امتیاز اور حمیرا فرح ہیں جبکہ میچ ریفری محمد انیس ہیں۔ مرد امپائر بھی امپائرنگ کررہے ہیں۔ یہ میچ ستمبر میں ہونے والی خواتین لیگ کی تیاریوں کی حصہ ہیں۔