سائنس دانوں نے پہلی بار حشرات کے مکمل دماغ کا نقشہ بنا لیا

ایک نئی تحقیق میں سائنس دانوں نے حشرات کے دماغ کا پہلا اور مکمل نقشہ تیار کیا ہے۔

نقشے میں پھلوں کی مکھی کے بچے کے دماغ میں موجود ہر ایک نیوران (پیغام رسانی کا کام کرنے والے خلیوں) کو دکھایا گیا ہے اور یہ کہ وہ کیسے ایک دوسرے سے جڑے ہوئے ہیں۔

سائنس دانوں کا کہنا ہے کہ نیورو سائنس کی یہ تاریخی کامیابی ماہرین کو حشرات کی سوچ کے طریقہ کار کو صحیح طور پر سمجھنے کے قابل بنا دے گی۔

لاروے کے دماغ کا نقشہ تین ہزار 16 نیورانز پر مشتمل ہے اور اس کے اندر موجود نیورل پاتھ وے کے تفصیلی سرکٹس کو ’کنیکٹوم‘ کا نام دیا گیا ہے۔

محققین کا کہنا ہے کہ یہ اب تک دماغ کا سب سے بڑا اور مکمل کنیکٹوم ہے جس کے بارے میں ہم اب تک جانتے تھے۔

کیمبرج یونیورسٹی کے مالیکیولر بائیولوجی کی میڈیکل ریسرچ کونسل لیبارٹری کے پروفیسر البرٹ کارڈونا اور مارٹا زلاٹک نے یونیورسٹی آف کیمبرج اور جانز ہاپکنز یونیورسٹی کے ساتھیوں اور دیگر نے اس تحقیق کی قیادت کی۔

ایک جاندار کا اعصابی نظام بشمول دماغ نیوران سے بنا ہوتا ہے جو ایک دوسرے سے Synapses کے ذریعے جڑے ہوتے ہیں۔

کیمیکلز کی شکل میں معلومات ایک نیوران سے دوسرے نیوران تک ان رابطہ پوائنٹس کے ذریعے ہی منتقل ہوتی ہیں۔