اداکارہ جویریہ عباسی نے شادی کی تصدیق کردی

کراچی: سینیئر اداکارہ جویریہ عباسی نے اپنی شادی کی تصدیق کردی۔

نجی ٹی وی چینل کو انٹرویو میں اداکارہ جویریہ عباسی نے انکشاف کیا کہ ان کی شادی کو 3 ماہ ہو چکے ہیں اور وہ اب اپنے شوہر کے ہمراہ پرسکون زندگی گزار رہی ہیں۔ ان کے شوہر کاروباری شخصیت ہیں اور ان کا شوبز سے کوئی تعلق نہیں ہے۔

اداکارہ نے کہا کہ ان کی بیٹی عنزیلہ عباسی کی مرضی سے انہوں نے شادی کے لیے حامی بھری۔ عنزیلہ عباسی سمیت تمام خاندان والوں اور دوستوں نے شادی کا مشورہ دیا تھا۔

انہوں نےمزیدکہا کہ بشریٰ انصاری اور ثمینہ احمد نے بڑی عمر میں شادی کرکے مجھ جیسی خواتین کو حوصلہ دیا۔ شادی سے قبل بشریٰ انصاری سے متعدد بار بات کی تو ان کا بھی یہی کہنا تھا کہ مجھے جلد شادی کرلینا چاہیے۔

جویریہ عباسی نے کہا کہ پہلے والد اور پھر والدہ کی بیماری کے باعث خود کے بارے میں سوچنے کا موقع نہیں ملا۔ بیٹی عنزیلہ کی شادی اور والدہ کے انتقال کے بعد تنہا رہ گئی تھی اس لیے شادی کا سوچا۔

یاد رہے کہ جویریہ عباسی کی پہلی شادی سال 1997 میں اداکار شمعون عباسی سے ہوئی تھی، شادی کے ایک سال بعد اُن کے ہاں بیٹی عنزیلہ عباسی کی پیدائش ہوئی تھی۔

جویریہ عباسی اور شمعون عباسی کے درمیان سال 2009 میں طلاق ہوگئی تھی۔ والدین کی طلاق کے بعد سے عنزیلہ عباسی اپنی والدہ کے پاس ہی رہیں اور سال 2023 میں جویریہ عباسی نے اپنی بیٹی کی شادی کی۔