اعظم نذیر تارڑ کی اسمبلی مدت میں مزید توسیع نہ کیے جانے کی یقین دہانی

اسلام آباد:وفاقی وزیر قانون اعظم نذیر تارڑ نے اسمبلی مدت میں مزید توسیع نہ کیے جانے کی یقین دہانی کراتے ہوئے کہا ہے کہ حکومت کا ایک ہی مقصد ہے کہ آزادانہ اور شفاف الیکشن ہوں۔

پارلیمنٹ میں میڈیا سے گفتگو میں اعظم نذیر تارڑ نے کہا کہ اسمبلی کی مدت میں مزید کوئی توسیع نہیں ہوگی۔

انہوں نے کہا کہ الیکشن ایکٹ میں چھوٹی چھوٹی بہت ساری خامیاں ہیں، جنہیں دور کرنا ضروری ہے، حکومت کا ایک ہی مقصد ہے کہ آزادانہ اور شفاف الیکشن ہوں۔

وفاقی وزیر قانون نے مزید کہا کہ پارلیمانی کمیٹی برائے انتخابی اصلاحات کے ممبر علی ظفر بھی ہیں، جو جماعتیں پارلیمان سے باہر ہیں، اُن کو سینیٹ کمیٹی سن چکی ہے۔

انہوں نے کہا کہ فافن اور پلڈاٹ کو بھی پہلے سن رکھا ہے، ان ہی نکات کا جائزہ کمیٹی لے رہی ہے، کوئی نیا کام نہیں کیا جا رہا، کمیٹی کی حتمی سفارشات سب کے سامنے لائیں گے۔