فیس بک متنازع پوسٹ ،طلبی کے باوجود وکیل خواجہ حارث ایف آئی اے کے سامنے پیش نہ ہوئے

راولپنڈی: سیشن کورٹ کے جج ہمایوں دلاور کی فیس بک متنازع پوسٹ کی تفتیش میں طلبی کے باوجود پی ٹی آئی چیئرمین کے وکیل خواجہ حارث ایف آئی اے کے سامنے پیش نہیں ہوئے۔

اسلام آباد ہائیکورٹ کے حکم پر ایف آئی اے سائبر کرائم سیل جج ہمایوں دلاور کی فیس بک متنازع پوسٹوں کے حوالے سے تفتیش کررہا ہے، اس ضمن میں گزشتہ روز چیئرمین پی ٹی آئی کے وکیل نعیم حیدر پنجوتھا سے 8 گھنٹے طویل تفتیش کی گئی۔

ایف آئی اے نے گزشتہ شب چیئرمین پی ٹی آئی کے وکیل خواجہ حارث کو بھی طلبی کا نوٹس جاری کیا تاہم وہ آج تفتیشی ٹیم کے سامنے پیش نہیں ہوئے۔

چیئرمین پی ٹی آئی کے سینئر وکیل خواجہ حارث کو بیان ریکارڈ کرنے لیے آج دن دوبجے کے لیے طلب کررکھا تھا لیکن دفتری اوقات کار ختم ہونے تک خواجہ حارث انکوائری میں پیش نہیں ہوئے۔

خیال رہے کہ اسلام آباد ہائیکورٹ نے ایف آئی اے کو فیس بک کی متنازع پوسٹوں کی انکوائری دو ہفتوں میں مکمل کر کے رپورٹ جمع کرانے کی ہدایت کی ہے۔