سائبیریامیں ہیلی کاپٹر بجلی کی تاروں سے ٹکرا کر تباہ، 6 سیاح ہلاک

ماسکو:سائبیریا میں ایک مسافر بردار ہیلی کاپٹر ہائی وولٹیج تاروں سے ٹکرا کر تباہ ہو گیا حادثے میں 6 افراد ہلاک اور 7 زخمی ہوگئے۔

غیر ملکی خبر رساں ادارے کے مطابق جنوبی سائبیریا کے الٹائی ریپبلک میں ایم آئی 8 ہیلی کاپٹر میں لینڈنگ کے وقت بجلی کے تاروں سے ٹکرا گیا جس کے نتیجے میں ہیلی کاپٹر میں آگ بھڑک اُٹھی۔

ہیلی کاپٹر میں 12 سیاح اور عملے کے 3 ارکان سوار تھے، ہیلی کاپٹر سیاحوں کو سائیبیریا کے صحت افزا مقامات کی سیر کے لیے لیکر گیا تھا،ریسکیو ادارے نے امدادی کاموں کے دوران 7 افراد کو زخمی حالت میں ملبے سے نکال لیا جب کہ بری طرح جھلس جانے کے باعث 6 افراد ہلاک ہوگئے۔

سائبیریا میں فضائی حادثات عام ہیں جس کی بڑی وجہ موسم کی خرابی ہونے کے علاوہ ان علاقوں میں پرواز کے لیے استعمل ہونے والے طیاروں اور ہیلی کاپٹرز کا قدیم ہونا بھی ہے۔