پنجاب کی عوام کی اکثریت نے وزیراعلی مریم نواز شریف کی حکومت پر اطمینان کا اظہار کردیا

پنجاب کی عوام کی اکثریت نے وزیراعلی مریم نواز شریف کی حکومت پر اطمینان کا اظہار کردیا۔ مریم نواز کی مقبولیت میں گزشتہ تین ماہ کے دوران اضافہ ہوا ہے۔روٹی کی قیمت میں کمی کے اقدام کو عوام نے سب سے زیادہ پسند کیاعوامی سروے کے نتائج سامنے آگئے ۔

وزیراعلیٰ پنجاب مریم نواز شریف کی صوبائی حکومت کے 100 دن کی کارکردگی سے متعلق انسٹی ٹیوٹ فار پبلک اوپینین ریسرچ (آئی پی او آر) کی جانب سے ایک عوامی سروے کیا گیا۔

29 مئی سے 12 جون تک کیے جانے والے اس سروے میں 2010 افراد کی رائے لی گئی جن میں 65 فیصد مرد جبکہ 35 فیصد خواتین شامل تھیں۔

سروے کے نتائج کے مطابق 55 فیصد افراد نے مریم نواز اور انکی حکومت کی کارکردگی پر اطمینان کا اظہار کیا ہے۔ شہری علاقوں میں 62 فیصد جبکہ دیہی علاقوں میں 48 فیصد افراد وزیراعلیٰ پنجاب مریم نواز کی کارکردگی سے مطمئن نظر آئے۔ 35 فیصد افراد صوبائی حکومت کی کارکردگی سے مطمئن دکھائی نہیں دیئے جن میں سے 51 فیصد کا خیال ہے کہ حکومت کبھی بھی صورتحال کو بہتر نہیں کر پائے گی۔

سروے کے مطابق مریم نواز کی مقبولیت میں بھی اضافہ دیکھنے میں آیا ہے۔ 60 فیصد افراد نے کہا کہ مریم نواز کی مقبولیت میں گزشتہ تین ماہ کے دوران اضافہ ہوا ہے۔اسی طرح 53 فیصد افراد نے حکومت کے قیمتوں میں کمی کے اقدامات کو موٴثر قرار دیا جن میں سے 44 فیصد افراد نے روٹی کی قیمت میں کمی کو سب سے پسندیدہ قدم قرار دیا۔

آئی او پی آر کے سروے کے مطابق مریم نواز کی حکومت کی جانب سے روٹی کی قیمت میں کمی سب سے زیادہ پسند کی گئی لیکن اسکے علاوہ سولر پینل پروگرام اور 200 کلینک آن وہیلز کے منصوبے بھی عوام میں مقبول رہے۔