نجم سیٹھی کا چیئرمین پی سی بی کی دوڑ سے دستبردار ہونے کا اعلان

لاہور : پاکستان کرکٹ بورڈ کی مینجمنٹ کمیٹی کے چیئرمین نجم سیٹھی نے چیئرمین پی سی بی کی دوڑ سے دستبردار ہونے کا اعلان کر دیا۔

سماجی رابطے کی ویب سائٹ ٹوئٹر پر اپنے ایک ٹویٹ میں نجم سیٹھی نے کہا کہ میں شریک چیئرمین پاکستان پیپلز پارٹی ( پی پی پی ) آصف زرداری اور وزیر اعظم شہباز شریف کے درمیان جھگڑے کا باعث نہیں بننا چاہتا۔

انہوں نے کہا کہ کہ ایسا عدم استحکام اور غیر یقینی صورتحال پاکستان کرکٹ بورڈ کے لیے اچھی نہیں ہے ان حالات میں میں پی سی بی کی چیئرمین شپ کا امیدوار نہیں ہوں، تمام اسٹیک ہولڈرز کو گڈ لک۔

خیال رہے کہ چیئرمین پاکستان کرکٹ بورڈ کے معاملے پر مسلم لیگ ن اور پیپلز پارٹی کے درمیان گزشتہ کئی روز سے تنازع چلا آ رہا تھا، ن لیگ چاہتی تھی کہ نجم سیٹھی کرکٹ بورڈ کے معاملات کو بہتر انداز سے چلا رہے ہیں اس لیے انہیں ہی برقرار رکھا جائے جبکہ پیپلز پارٹی کا کہنا تھا کہ چیئرمین پی سی بی ذکا اشرف کا حق ہے، حکومت اگر نجم سیٹھی کو رکھنا چاہتی ہے تو انہیں کہیں اور لگا دیا جائے۔