پیرو کے وزیراعظم آڈیو لیک ہونے پر عہدے سے مستعفی

پیرو : پیرو کے وزیراعظم البرتو اوتارولا خاتون کے ساتھ گفتگو کی آڈیو لیک ہونے پر عہدے سے مستعفی ہوگئے۔

غیرملکی میڈیا کے مطابق البرتو اوتارولا پر خاتون کو سرکاری ٹھیکے دلوانے کے لیے اپنا اثرورسوخ استعمال کرنے کا الزام ہے، یہ سکینڈل گزشتہ ہفتے شدت اختیار کرگیا تھا جب ایک چینل نے البرتو کی خاتون سے گفتگو کی آڈیو نشر کی۔

غیرملکی میڈیا کے مطابق آڈیو کلپس میں البرتو کو خاتون سے اظہارِ محبت اور سی وی بھیجنے کا کہتے سنا جاسکتا ہے۔

ادھر البرتو اوتارولا نے خود پر لگنے والے الزامات کو مسترد کیا ہے ، اس حوالے سے تحقیقات جاری ہیں۔

غیرملکی میڈیا کے مطابق البرتو اوتارولا 2022ء کے اختتام تک پیرو کے وزیرِ دفاع کی حیثیت سے کام کررہے تھے، ڈینا بولوارتے کے صدر بننے کے بعد انہیں پیرو کا وزیراعظم بنایا گیا تھا۔