کچے کے علاقے میں پولیس کی جوابی کارروائی ، ڈاکووٴں کا سرغنہ مارا گیا

لاہور: کچے کے علاقے میں پولیس پر راکٹ حملوں کی جوابی کارروائی میں ڈاکووٴں کا سرغنہ بشیر شر مارا گیا اور اس کے پانچ ساتھی ڈاکو شدید زخمی ہوئے ہیں۔

وزیر اعلیٰ پنجاب مریم نواز کی ہدایت پر پنجاب پولیس نے برق رفتار آپریشن کرتے ہوئے رحیم یار خان میں کچے کے علاقے میں راکٹ حملے میں ملوث گینگ کو گھیر لیا۔ پولیس ٹیم کی کارروائی کے دوران ڈاکووٴں کا سرغنہ بدنام زمانہ بشیر شر مارا گیا جب کہ اس کے 5 ساتھی بری طرح زخمی ہو گئے۔

زخمی ہونے والے ڈاکووٴں میں ثنا اللہ شر ، گدا علی ، کملو شر ، رمضان شر اور گدی شامل ہیں۔پولیس کی اس جوابی کارروائی میں مزید ڈاکووٴں کے زخمی ہونے کی بھی اطلاعات ہیں۔

پنجاب پولیس کا کہنا ہے کہ رحیم یار خان میں کچے کے علاقے میں گزشتہ رات سے پولیس ایکشن جاری ہے۔ آخری حملہ آور کے خاتمے تک ڈاکووٴں کا پیچھا جاری رہے گا۔

ادھر وزیراعلیٰ پنجاب مریم نواز نے بشیر شر کی ہلاکت پر پولیس ٹیم کو شاباش دیتے ہوئے کہا کہ کچے کے علاقے کو ڈاکووٴں سے پاک کرنے کا عزم پورا کریں گے۔ پولیس کے شہدا کی قربانیاں بھول نہیں سکتے۔