وزیراعظم شہباز شریف کی انوارالحق کاکڑ کو نگران وزیراعظم بننے پر مبارکباد

لاہور: وزیراعظم شہباز شریف نے انوار الحق کاکڑ کو نگران وزراعظم منتخب ہونے پر مبارکباد پیش کی ہے۔ اور کہا کہ دعاگو ہوں کہ نگران وزیراعظم اور ان کی کابینہ عوام اور آئین کی توقعات پر پورا اتریں۔

اپنے ایک پیغام میں نے کہا کہ بلوچستان سے نگران وزیراعظم کا انتخاب خوش آئند ہے، آئینی طریقہ کار پر چلتے ہوئے ایک اچھے نام پر اتفاق ہوا، اپوزیشن لیڈر راجہ ریاض کا شکریہ ادا کرتا ہوں جنہوں نے مشاورت میں مدد کی، انوار الحق کاکڑ ایک پڑھے لکھے اور محب وطن شخصیت ہیں۔

انہوں نے کہا کہ تمام جماعتوں کی طرف سے انوار الحق کاکڑ کے نام پر اعتماد ہمارے درست انتخاب کی علامت ہے، امید ہے کہ وہ ملک میں شفاف، آزادانہ اور غیرجانبدارانہ انتخابات کے انعقاد کو یقینی بنائیں گے۔

وزیراعظم نے کہا کہ 16 ماہ میں ہم نے دن رات محنت کر کے ملک کو جس معاشی استحکام سے ہمکنار کیا امید ہے اس کا تسلسل جاری رہے گا، ترقی، تعمیر اور معاشی بہتری کا تسلسل یقینی بنانا پاکستان اور عوام کی بہتری کیلئے ضروری ہے، دعاگو ہوں کہ نگران وزیراعظم اور ان کی کابینہ عوام اور آئین کی توقعات پر پورا اتریں۔