رمشا خان نے شوبز انڈسٹری چھوڑنے سے متعلق خبروں کو بے بنیاد قرار دے دیا

لاہور: معروف و خوبرو اداکارہ رمشا خان نے شوبز انڈسٹری چھوڑنے سے متعلق خبروں کی تردید کرتے ہوئے بے بنیاد قرار دیتے ہوئے کہا کہ اداکاری نہیں چھوڑ رہی، براہ کرام سوشل میڈیا پر جو دیکھیں اس پر یقین نہ کریں۔

فوٹو اینڈ ویڈیو شیئرنگ پلیٹ فارم انسٹاگرام پر سٹوری شیئر کرتے ہوئے اداکارہ رمشا خان نے مداحوں کو سوشل میڈیا پر وائرل خبروں پر کان نہ دھرنے کی درخواست کی، اداکارہ نے اپنی انسٹاگرام سٹوری میں لکھا کہ ’میں اداکاری نہیں چھوڑ رہی، براہ کرام سوشل میڈیا پر جو دیکھیں اس پر یقین نہ کریں‘۔

خیال رہے کہ گزشتہ چند دنوں سے اداکارہ رمشا خان کا ایک ویڈیو کلپ وائرل ہو رہا تھا جس میں اداکارہ نے ایک سوال پر شادی کے بعد اداکاری سے کنارہ کشی اختیار کرنے کا اظہار کیا تھا، تاہم اب رمشا خان نے اس حوالے سے تمام خبروں کی تردید کر دی ہے۔