رضا ربانی کا اندھی قانون سازی کے خلاف سینٹ سے واک آوٴٹ

اسلام آباد:پاکستان پیپلز پارٹی کے سینیٹر میاں رضا ربانی نے اندھی قانون سازی کے خلاف ایوان سے واک آوٴٹ کرنے کردیا۔

چیئرمین سینیٹ صادق سنجرانی کی صدارت میں ہونے والے اجلاس کے دوران پی پی پی کے سینیٹر رضا ربانی نے ایوان میں اظہارِ خیال کرتے ہوئے کہا کہ آج جس انداز سے بلز پاس ہوئے ہیں، یہ ایک سیاہ دن ہے۔

رضا ربانی نے کہا کہ آج انتہائی اہم بلز ایجنڈے میں ہیں، یہ بلز ہمیں آج ہی ملے ہیں۔ ایچ ای سی سے متعلق بل غیر قانونی ہے، اس کا مقصد اٹھارہویں ترمیم کو رول بیک کرنا ہے، اس بل کو سی سی آئی سے منظور ہونا تھا۔

چیئرمین سینیٹ صادق سنجرانی نے پی پی پی سینیٹر رضا ربانی کے اعتراض پر کہا کہ ایچ ای سی سے متعلق بل آج نہیں آ رہا۔

سینیٹر میاں رضا ربانی نے واک آوٴٹ کا اعلان کرتے ہوئے کہا کہ آج جس انداز سے بلز پاس ہوئے ہیں یہ ایک سیاہ دن ہے، میں اس اندھی قانون سازی کے خلاف ایوان سے واک اوٹ کرتا ہوں۔