روٴف حسن ایک روزہ جسمانی ریمانڈ پر سی ٹی ڈی کے حوالے

اسلام آباد: انسداد دہشت گردی عدالت نے پی ٹی آئی ترجمان روٴف حسن کو ایک روزہ جسمانی ریمانڈ پر سی ٹی ڈی کے حوالے کردیا۔

تھانہ سی ٹی ڈی میں درج بارودی مواد کی برآمدگی کے مقدمے میں ترجمان پاکستان تحریک انصاف روٴف حسن کو 2 دن کا جسمانی ریمانڈ مکمل ہونے پر انسداد دہشت گردی عدالت اسلام آباد میں پیش کیا گیا، جس میں سی ٹی ڈی کی جانب سے مزید 7 روز کے جسمانی ریمانڈ کی استدعا کردی گئی۔

دوران سماعت پراسیکیوٹر نے اپنے دلائل میں کہا کہ کچھ ناموں کے حوالے سے تفتیش کرنی ہے ، اکاوٴنٹس کی تفصیلات جاننی ہیں۔ روٴف حسن کی نشاندہی پر ترنول میں چھاپے بھی مارے ہیں ، اس میں بھی کامیابی نہیں ہوئی۔ روٴف حسن بیماری کا بہانہ بنا کر تفتیش میں مدد نہیں کررہے۔

روٴف حسن کے وکیل حسن علی بخاری نے عدالت میں کہا کہ 2 دن کا جسمانی ریمانڈ لے چکے ہیں، ایک دن پہلے سے روٴف حسن سی ٹی ڈی کے پاس ہیں۔ 3 دن سے روٴف حسن سی ٹی ڈی کے پاس ہیں، مگر پراگرس صفر ہے۔ پراسکیوشن بتائے کہ اس مقدمے میں روٴف حسن کا تعلق کیسے ہے؟۔

وکیل نے کہا کہ قانون شہادت کے سیکشن 38 کے مطابق پولیس حراست میں ملزم اقرار بھی کرے تب بھی ایکسٹرا جوڈیشل کنفیشن ہوگا۔ ملزم کا تعلق واضح نہیں ہورہا تو عدالت کے پاس اختیار ہے کہ ریمانڈ دینے کے بجائے مقدمے سے ڈسچارج کردے۔ آج روٴف حسن سیڑھیاں چڑھنے کے قابل نہیں تھے ، 10 منٹ تک نیچے کھڑے رہے۔ پراسکیوشن کا کیس مضبوط کرنے کے لیے ریمانڈ دیا جائے تو یہ زیادتی ہوگی۔ روٴف حسن بیمار ہیں، خدانخواستہ کچھ ہوگیا تو کون ذمے داری لے گا۔ جیل کے ڈاکٹر نے کہا کہ میں روٴف حسن کو اپنے ذمے نہیں لیتا۔

پراسیکیوٹر نے کہا کہ روٴف حسن نے قبول کیا ہے کہ انہوں نے رقم دی ، یہ دہشتگردی کی رقم سے معاونت میں آتا ہے۔ اس موقع پر جج طاہر عباس سپرا نے استفسار کیا کہ یہ آپ نے رپورٹ میں تو شامل نہیں کیا، جس پر پراسیکیوٹر نے جواب دیا کہ یہ ابھی تفتیش کے بعد شامل کرنا ہے۔

جج نے استفسار کیا کہ گزشتہ 2 روز میں کیا تفتیش کی ہے ؟ ، جس پر پراسیکیوٹر نے جواب دیا کہ خان نامی بندے کا بتایا تو ہم نے ترنول میں چھاپا مارا ہے، بندہ نہیں ملا۔ روٴف حسن کا میڈیکل کرانے میں وقت لگ جاتا ہے اور جب یہ کہتے بیمار ہوں تو ہم تفتیش نہیں کرسکتے۔ یہ ابھی ٹی ٹی پی سے تعلقات کا بتا دیں کہ کیسے ہوا، اس کے بعد بے شک جوڈیشل کردیں۔

جج طاہر عباس سپرا نے ریمارکس دیے کہ بینک اکاونٹس کی انفارمیشن چاہیے تو ابھی 10 منٹ دیتا ہوں، آپ ابھی حاصل کرسکتے ہیں۔ پراسیکیوٹر نے کہا کہ اس کے لیے بھی اجازت لینی ہوتی ہے اور اس کے لیے درخواست دیتے ہیں۔

وکیل نے کہا کہ پراسکیوٹر صاحب کا شکریہ کہ انہوں نے روٴف حسن کو دہشت گرد نہیں کہا۔

بعد ازاں عدالت نے ترجمان پی ٹی آئی روٴف حسن کے ریمانڈ پر فیصلہ محفوظ کرلیا، جسے بعد جاری کردیا گیا۔ فیصلے کے مطابق عدالت نے روٴف حسن کو ایک دن کے جسمانی ریمانڈ پر سی ٹی ڈی کے حوالے کردیا۔