راولپنڈی میں محرم الحرام کے لئے سیکیورٹی پلان جاری، 6 ہزار اہلکار ڈیوٹی دیں گے، سی پی او

راولپنڈی : راولپنڈی پولیس نے محرم الحرام کےلیے سیکیورٹی پلان جاری کر دیا۔ سی پی او خالد ہمدانی کے مطابق راولپنڈی پولیس کے 6 ہزار سے زائد اہلکار ڈیوٹی دیں گے۔

سی پی او خالد ہمدانی کے مطابق راولپنڈی شہر کے داخلی اور خارجی راستوں پر سخت چیکنگ کی جائے گی۔

انہوں نے بتایا کہ جلوسوں کی سیف سٹی کیمروں کے ذریعے کڑی نگرانی کی جائے گی۔

سی پی او کا کہنا تھا کہ مجالس اور جلوسوں کے دوران چھتوں پر نشانہ باز تعینات ہونگے جبکہ محرم میں 447 جلوس اور 1925 مجالس کو سیکیورٹی فراہم کی جائے گی۔

سی پی او خالد ہمدانی کے مطابق 59 حساس جلوسوں اور 274 حساس مجالس کےلیے خصوصی نفری تعینات ہوگی۔

انہوں نے کہا کہ ضلعی پولیس، ٹریفک پولیس، ڈولفن فورس اور 1 ہزار سے زائد رضاکار بھی ڈیوٹی دیں گے۔ اسلحے کی نمائش اور لاؤڈ اسپیکر کے استعمال پر پابندی رہے گی۔

سی پی او خالد ہمدانی کے مطابق محرم الحرام کے دوران سوشل میڈیا کی خصوصی مانیٹرنگ کی جائے گی۔ مذہبی و فرقہ وارانہ پوسٹ کرنے والوں کے خلاف سخت کارروائی ہوگی۔