صنم جاوید خیبرپختونخوا ہاوٴس اسلام آباد میں قیام پذیر

اسلام آباد: پاکستان تحریک انصاف کی رہنماء صنم جاوید اپنے اہل خانہ سمیت اسلام آباد میں خیبرپختونخوا ہاوٴس میں مقیم ہیں۔

ذرائع کے مطابق صنم جاوید کے پی ہاوٴس میں موجود ہیں۔ وزیراعلی کے پی علی امین گنڈاپور نے صنم جاوید کے والد سے رابطہ کرکے انہیں اور صنم جاوید سمیت تمام اہل خانہ کو کے پی ہاوٴس میں رہنے کی گزارش کی تھی۔

ترجمان کے پی ہاوٴس یار محمد نیازی نے کہا ہے کہ پی ٹی آئی رہنما صنم جاوید اپنی مرضی سے اپنی فیملی کے ساتھ کے پی ہاوٴس اسلام آباد میں ہیں۔
اسلام آباد ہائی کورٹ نے پولیس کو جمعرات تک صنم جاوید کو گرفتار کرنے اور اسلام آباد سے باہر لے جانے سے بھی روک دیا ہے۔
صنم جاوید کو گوجرنوالہ جیل سے رہا ہونے کے بعد اسلام آباد پولیس نے گرفتار کرکے بلوچستان پولیس کے حوالے کردیا تھا جو انہیں کوئٹہ لے جانا چاہتی تھی تاہم ہائی کورٹ نے صنم جاوید کو اسلام آباد سے باہر لے جانے سے روک دیا۔