ٹی 20 ورلڈ کپ، ویسٹ انڈیز کے ہاتھوں افغانستان کو 104 رنز سے شکست

سینٹ لوشیا: آئی سی سی ٹی 20 ورلڈ کپ 2024ء کے میچ میں ویسٹ انڈیز نے افغانستان کو 104 رنز سے شکست دے دی۔

انٹرنیشنل کرکٹ کونسل کے زیر اہتمام امریکا اور ویسٹ انڈیز کی میزبانی میں ہونے والے ٹی ٹوئنٹی ورلڈ کپ 2024ء کے 40 ویں میچ میں افغانستان نے ٹاس جیت کر میزبان ٹیم ویسٹ انڈیز کو بیٹنگ کرنے کی دعوت دی، دونوں ٹیمیں سینٹ لوشیا کے ڈیرن سیمی کرکٹ سٹیڈیم میں مدمقابل ہوئیں۔

افغانستان کی دعوت پر ویسٹ انڈیز نے بیٹنگ شروع کی لیکن شروعات اچھی نہ ہوئی، 23 رنز کے مجموعی سکور پر اوپنر برینڈن کنگ 7 رنز بنا کر بولڈ ہو گئے، ان کے بعد آنے والے نکولس پورن نے جونسن چارلس کے ساتھ مل کر افغان باوٴلرز کی خوب درگت بنائی۔

نکولس پورن نے 53 گیندوں پر 98 رنز بنا کر ٹیم کی پوزیشن مستحکم کر دی جبکہ جونسن چارلس 43 رنز کی اننگز کھیل کر نمایاں رہے، چوتھے اور پانچویں نمبر پر آنے والے شائی ہوپ اور رومن پاول نے بھی میچ کا مجموعی سکور آگے بڑھانے میں اپنا بھرپور کردار ادا کیا۔

رومن پاول اور شائی ہوپ بالترتیب 26 ، 25 رنز بنا کر آوٴٹ ہو گئے، یوں میزبان ویسٹ انڈیز نے مقررہ اوورز میں 218 رنز بنائے، افغانستان کی جانب سے گلبدین نائب نے 2 کھلاڑیوں کو آوٴٹ کیا جبکہ عظمت اللہ عمر زئی اور نوین الحق نے ایک ایک وکٹ حاصل کی۔

بڑے ہدف کے جواب میں افغانستان کی بیٹنگ مایوس کن رہی، اوپنر رحمان اللہ گرباز پہلے ہی اوور کی تیسری بال پر کیچ دے کر پویلین لوٹ گئے، ابراہیم زادران کا ساتھ دینے کیلئے آنے والے گلبدین نائب بھی 10 بالز کے مہمان ثابت ہوئے اور ایل بی ڈبلیو آوٴٹ ہو گئے۔

اوپنر ابراہیم زدران اور چوتھے نمبر کے بیٹر عظمت اللہ عمرزئی نے میزبان ٹیم کیخلاف بھرپور مزاحمت کی لیکن کسی کام نہ آئی، دونوں بالترتیب 38 اور 23 رنز بنا کر نمایاں رہے، راشد خان نے 18، کریم جنت نے 14 سکور کیے، نوین الحق 4، نور احمد 2، محمد نبی 1 ہی رن بنا پائے۔

ویسٹ انڈیز کی جانب سے عبید مکائے نے شاندار باوٴلنگ کرتے ہوئے 3 اوورز میں 14 رنز دے کر 3 کھلاڑیوں کو آوٴٹ کیا، عقیل حسین نے 2 اور گڈکیش موتی نے 2، 2 وکٹیں حاصل کیں، آندرے رسل اور الزاری جوزف نے ایک ایک کھلاڑی کو پویلین کی راہ دکھائی۔