برسبین اوپن ٹینس ٹورنامنٹ 31 دسمبرسے آسٹریلیا میں شروع ہوگا

کینبرا: ایسوسی ایشن آف ٹینس پروفیشنلز (اے ٹی پی ) ٹور اور ویمنز ٹینس ایسوسی ایشن ( ڈبلیو ٹی اے ) ٹور کے زیر اہتمام برسبین اوپن ٹینس ٹورنامنٹ کا 13واں ایڈیشن 31 دسمبر سے آسٹریلیا کے شہر برسبین میں شروع ہوگا۔

برسبین انٹرنیشنل اوپن ٹینس منتظمین کے مطابق ٹورنامنٹ کے کامیاب انعقاد کے لئے تیاریاں جاری ہیں، ٹورنامنٹ میں مینز سنگلز، ویمنز سنگلز ، مینز ڈبلز اور ویمنز ڈبلز مقابلے ہوں گے۔

بیلاروس کی نامور ٹینس سٹار اور آسٹریلین اوپن ٹینس 2023 کی چیمپئن آرینا سبالینکا نے آئندہ سال کے پہلے گرینڈ سلام سے قبل برسبین انٹرنیشنل ٹینس ٹورنامنٹ میں شرکت کی تصدیق کر دی ہے۔

25 سالہ آرینا سبالینکا نے آسٹریلین اوپن ٹینس 2023 کے فائنل میچ میں قازقستان کی ٹینس کھلاڑی ایلینا ریباکینا کو شکست دی تھی۔

عالمی نمبر ٹوآرینا سبالینکا نے منتظمین کی جانب سے جاری کردہ ایک بیان میں کہاہے کہ میں برسبین میں اپنے آسٹریلین اوپن ٹینس ٹائٹل کے دفاع سے قبل وارم اپ ایونٹ میں شرکت کے لیے پرجوش ہوں ، میلبورن میں اپنے کیریئر کا پہلا گرینڈ سلام ٹائٹل آسٹریلین اوپن جیتنے کے بعد آسٹریلیا میرے دل میں ایک خاص مقام رکھتا ہے۔

برسبین اوپن ٹینس ٹورنامنٹ کے ڈائریکٹر کیم پیئرسن نے کہا کہ وہ بیلاروسی کھلاڑی آرینا سبالینکا اور ماسکو میں پیدا ہونے والی قازقستان کی ایلینا ریباکینا کے استقبال کے منتظر ہیں۔

کیم پیئرسن نے کہا کہ وہ آسٹریلوی نک کرگیوس کو ٹورنامنٹ میں خوش آمدید کہیں گے، اگر وہ انجری سے بروقت صحت یاب ہو گئے، نک کرگیوس کے گھٹنے کی جنوری میں سرجری ہوئی تھی اور وہ اب بحالی صحت کے عمل سے گزر رہے ہیں۔

برسبین اوپن ٹینس ٹورنامنٹ 31 دسمبر 2023سے 7 جنوری 2024تک برسبین میں کھیلا جائے گا۔