بجلی کے زائد بلوں کے خلاف خواجہ سرا بھی میدان میں آگئے

راولپنڈی :بجلی کے زائد بلوں کے خلاف خواجہ سرا بھی میدان میں آگئے۔ راولپنڈی میں خواجہ سراؤں کا بجلی کے بلوں کے احتجاجی مظاہرہ، مظاہرین نے مری روڈ کو بلاک کرکے نعرے بازی جس سے ٹریفک روانی متاثر ہوئی۔

راولپنڈی شی میل ایسوسی ایشن کی چیئرپرسن الماس بوبی کی کال پر خواجہ سراؤں کی بڑی تعداد آئیسکو آفس مریڑ چوک آفس کے باہر جمع ہوئی اور احتجاج ریکارڈ کرایا۔

مظاہرین نے ہاتھوں میں پلے کارڈز اور بینرز اٹھا رکھے تھے جن پر نعرے درج تھے،مظاہرین خواجہ سراؤں نے مری روڈ تک مارچ کیا اور مریڑ چوک کو بند کرکے سینے پیٹتے رہے۔

مظاہرین کا کہنا تھا کہ بجلی کے زائد بلوں سے دیگر افراد کی طرح خواجہ سرا بھی متاثر ہوئے ہیں، حکومت فوری بجلی کے بلوں میں اضافہ واپس لے، خواجہ سرا احتجاج ریکارڈ کرانے کے بعد پرامن طور پر منتشر ہوگئے۔