عبرانی بائبل کا قدیم ترین نسخہ نیلام، اسرائیل کے’ ’عجائب گھر‘ ‘میں رکھا جائے گا

نیویارک: امتدادِ زمانہ سے محفوظ رہنے والا عبرانی بائبل کا قدیم ترین نسخہ نیلامی کے بعد اسرائیل بھیجا جا رہا ہے جہاں اسے ایک ’عجائب گھر‘ میں رکھا جائے گا۔ عبرانی نسخہ رومانیہ میں امریکہ کے سابق سفیر، ایلفرڈ ایچ موسیس نے خریدا ہے۔

نیویارک کے مشہور نیلام گھر ’سودبے‘ میں یہ نسخہ 3 کروڑ 80 لاکھ ڈالر میں نیلام کیا گیا ہے۔ یہ چرمی جلد میں بند ہے جسے ہاتھ سے تحریر کیا گیا ہے۔ قریباً مکمل عبرانی نسخہ رومانیہ میں امریکہ کے سابق سفیر، ایلفرڈ ایچ موسیس نے خریدا ہے۔

انہوں نے اسے اے این یو میوزیم آف دی جیوش پیپل کے لیے خریدا ہے جو تل ابیب میں واقع یہودی تاریخ کا ایک مشہور میوزیم بھی ہے۔
اس نسخے کا نام کوڈیکس ساسون ہے جسے 880 سے 960 عیسوی کے دوران لکھا گیا تھا۔

اسے عراقی یہودی تاجر کے بیٹے، ڈیوڈ سولومن ساسون نے خریدا تھا۔ جب لندن میں اس نے اپنا گھر خالی کیا تو اس میں یہ نایاب شے بھی سامنے آئی۔کوڈیکس قدیم نسخے کو کہا جاتا ہے جبکہ ساسون کا نام اس کے مالک کے نام پر رکھا گیا ہے۔