Physical Address
304 North Cardinal St.
Dorchester Center, MA 02124
لاہور:تحریک انصاف کو بڑا جھٹکا لگ گیا، تحریک انصاف کی تین خواتین رہنماؤں نے پارٹی ڈے علیحدگی اختیار کر لی ۔
استحکام پاکستان پارٹی کے سربراہ جہانگیر ترین سے عندلیب عباس، سابق ارکان پنجاب اسمبلی سعدیہ سہیل، سمیرا بخاری نے ملاقات کی، جہانگیر ترین سے ملاقات میں تینوں خواتین رہنماؤں نے پی ٹی آئی چھوڑنے کا اعلان کیا۔
ملاقات کے دوران عندلیب عباس، سابق ارکان پنجاب اسمبلی سعدیہ سہیل، سمیرا بخاری نے آئی پی پی میں شمولیت کا اعلان کر دیا، شمولیت کے لئے ہونے والی ملاقات میں عون چودھری بھی شریک ہوئے۔
تینوں خواتین رہنماؤں نے پی ٹی آئی چھوڑنے اور آئی پی پی میں شمولیت کا باضابطہ اعلان استحکام پاکستان پارٹی کی ترجمان فردوس عاشق اعوان کے ساتھ پریس کانفرنس میں کیا۔
فردوس عاشق اعوان نے کہا کہ پی ٹی آئی خواتین اراکین کی شمولیت سے استحکام پارٹی کے کنبے میں اضافہ ہوگا، استحکام پاکستان پارٹی کے منشور کے لیے خواتین ہراول دستہ کا کردار ادا کریں گی۔
اس موقع پر آئی پی پی کی رہنما منزہ حسن نے کہا کہ عندلیب عباس، سعدیہ سہیل، سمیرا احمد بخاری کو پارٹی میں خوش آمدید کہتی ہوں۔
میڈیا سے گفتگو کرتے ہوئے عندلیب عباس نے کہا کہ آج ہم پھر اپنے دوستوں کے ساتھ اکٹھے ہو گئے ہیں، اب ہم نے آگے دیکھنا ہے، کاز کو آگے ہونا چاہیے کسی ایک فرد کو نہیں، عام آدمی کے حالات بہت خراب ہیں، عام آدمی کے لیے مہنگائی میں جینا مشکل ہو گیا ہے۔
انہوں نے کہا کہ بجلی کے بل ادا کرنے کے لیے لوگ موٹرسائیکل، زیور بیچ رہے ہیں، ہم نے عام آدمی کے حالات کی بہتری کے لیے کام کرنا ہے، غریب آدمی اس وقت بےبس ہے، غربت کی وجہ سے لوگ ڈاکے مار رہے ہیں، ایک شخص نے بچی کی فیس ادا نہ ہونے پر زندگی کا خاتمہ کر لیا۔
عندلیب عباس نے کہا کہ ہمارا کاز ایک ہے، جگہیں بدلتی رہتی ہیں، استحکام پاکستان پارٹی میں شمولیت ہم سب کا اپنا اپنا فیصلہ ہے، انہوں نے کہا کہ روپوش ہونے والے پی ٹی آئی اراکین سے کوئی رابطہ نہیں۔
سابق ایم پی اے سعدیہ سہیل نے کہا کہ میرا غیرسیاسی بیک گراؤنڈ ہے، پارٹیوں سے بالاتر ہو کر ملک کے مفاد کے لیے ہم یہاں آج بیٹھے ہیں، ہم سب مل کر عام آدمی کی بہتری کے لیے کام کریں گی، نو مئی کا واقعہ نہیں ہونا چاہیے تھا، یہ ملک ہمارا اور اس کے ادارے ہمارے ہیں۔
سابق ایم پی اے سمیرا احمد بخاری نے کہا کہ آج ہم پھر سے ایک جگہ پر اکٹھے بیٹھے ہیں، ہمارا ملک ہی ہماری پہچان ہے،ہمیں عام آدمی کی زندگیوں میں تبدیلی لانی ہے۔
