امریکہ کی اپنے شہریوں کو گلگت بلتستان میں محتاط رہنے کی ہدایت

اسلام آباد: امریکہ نے پاکستان میں اپنے شہریوں کو گلگت بلتستان کی صورت حال میں احتیاطی تدابیر اختیار کرنے کی ہدایت کرتے ہوئے کہا ہے کہ وہ بڑے اجتماعات سے گریز کریں۔

امریکی سفارتخانے کے مطابق سکردو اور دیامر میں حالیہ مظاہروں، سڑکوں کی بندش کی وجہ سے امریکی شہریوں کو زیادہ احتیاط برتنی چاہئے، گلگت بلتستان میں موبائل اور انٹرنیٹ سروس کی بندش کی وجہ سے امریکی شہری احتیاط کریں، ان علاقوں میں پرامن نظر آنے والے اجتماعات بھی بغیر کسی اطلاع کے پرتشدد ہوسکتے ہیں۔

امریکی سفارتخانے نے کہا امریکی شہریوں کو سختی سے آگاہ کیا جاتا ہے کہ وہ بڑے اجتماعات سے گریز کریں، امریکی شہری ان متاثرہ علاقوں میں مقامی میڈیا رپورٹس سے آگاہ رہیں، ہم اپنے شہریوں کو آگاہ کرتے ہیں کہ اپنے ارد گرد کے ماحول سے ہر وقت چوکس رہیں۔