لاہور:سابق صدر اور حکومتی اتحادی پیپلز پارٹی کے شریک چیئرمین آصف علی زرداری لاہور میں وزیراعظم شہباز شریف سے ملاقات کےلیے پہنچ گئے۔
وزیراعظم آفس کے اعلامیے کے مطابق آصف علی زرداری ملاقات کےلیے وزیراعظم شہباز شریف کی لاہور کی رہائش گاہ پہنچے ہیں۔
اعلامیے کے مطابق پاکستانی سیاست کے دونوں بڑے رہنما ملاقات کے دوران ملکی سیاسی صورتحال سمیت دیگر امور پر تفصیلی مشاورت کریں گے۔
ذرائع کے مطابق آصف زرداری لاہور میں چند دن قیام کریں گے، اُن کی وزیراعظم سے ملاقات میں نگراں سیٹ اپ پر مشاورت متوقع ہے۔
ذرائع کے مطابق سابق صدر اپنے دورے کے دوران استحکام پاکستان پارٹی کے سربراہ جہانگیر ترین سے اُن کے بھائی کی وفات پر تعزیت بھی کریں گے۔
ذرائع کے مطابق آصف زرداری کے لاہور قیام کے دوران پی ٹی آئی چھوڑنے والے دھڑوں کی پیپلز پارٹی میں شمولیت کا بھی امکان سامنے آیا ہے۔
