اسلام آباد: فوجی مشق کیمبرین پیٹرول 2024ء میں پاک فوج کی ٹیم نے غیر معمولی کارکردگی دکھائی جس پر ٹیم کو گولڈ میڈل سے نوازا گیا۔
آئی ایس پی آر کے مطابق فوجی مشق کیمبرین پیٹرول 2024ء برطانیہ کے علاقے ویلز میں 4 سے 13 اکتوبر کے دوران منعقد ہوئیں، اس سال ایکسرسائز کیمبرین پٹرول کے انعقاد کے 65 سال مکمل ہوئے۔
مشق کے دوران ٹیموں کو بہترین پیشہ ورانہ معیار کو برقرار رکھتے ہوئے مختلف رکاوٹیں عبور کیں، جن میں دشوار گزار علاقوں میں گشت اور ان پیچیدہ علاقوں میں حالات کا سامنا کرتے ہوئے بہتر حکمت عملی کے ساتھ 48 گھنٹے کے اندر 60 کلو میٹر کا فاصلہ طے کرنا شامل تھا، جن میں مختلف ٹاسک کو طے کرنا بھی شامل تھا۔
اس سال 42 ممالک کی 128 ٹیموں نے مشق میں حصہ لیا اور ان تمام ٹیموں میں سے پاک فوج کی ٹیم نے غیر معمولی کارکردگی کا مظاہرہ کیا، جس پر انہیں گولڈ میڈل سے نوازا گیا۔
ترجمان کے مطابق یہ کامیابی پوری قوم اور پاک فوج کے لیے ایک قابل فخر موقع ہے، پاک فوج اپنی پیشہ ورانہ مہارت اور تربیت کے اعلیٰ ترین معیار کے لیے جانی جاتی ہے، پاک فوج نے ہمیشہ ملک کا پرچم سربلند رکھا ہے، الحمدللہ۔
