الیکشن ٹریبونل کیخلاف پی ٹی آئی امیدوار عامر مغل کی درخواست پر حکم امتناع جاری

اسلام آباد:اسلام آباد الیکشن ٹریبونل سے متعلق اسلام آباد ہائی کورٹ نے اسلام آباد سے پی ٹی آئی کے امیدوار عامر مغل کی درخواست پر حکم امتناع جاری کردیا اور ان کی الیکشن پٹیشن کی حد تک ٹریبونل کو کاروائی سے روک دیا۔
اسلام آباد الیکشن ٹریبونل سے متعلق پی ٹی آئی کے امیدوار شعیب شاہین کی درخواست پر چیف جسٹس اسلام آباد ہائی کورٹ عامر فاروق نے سماعت کی۔
عامرمغل کے وکیل فیصل فرید چوہدری عدالت میں پیش ہوئے، عدالت نے الیکشن ٹربیونل کو حلقہ این اے46 سے متعلق بھی کاروائی سے روک دیا اور فریقین کو نوٹس جاری کرکے جواب طلب کرلیا، کیس کی آئندہ سماعت رجسٹرار آفس مقرر کرے گا۔
این اے 46 سے انجم عقیل خان ایم این اے بنے، عامر مغل نے ان کی کامیابی کو چیلنج کر رکھا ہے، الیکشن ٹریبیونل اب تینوں حلقوں سے متعلق کارروائی آگے نہیں بڑھا سکے گا۔
عامرمغل نے نئے الیکشن ٹربیونل کی تعیناتی کو چیلنج کررکھا ہے۔
عامرمغل نے الیکشن کمیشن کے فیصلے کے خلاف اسلام آباد ہائی کورٹ سے رجوع کیا تھا، جسٹس(ر)عبدالشکور پراچہ اسلام آباد کے تینوں حلقوں میں مبینہ دھاندلی کے خلاف اپیل سن رہے ہیں۔
الیکشن ٹریبونل نے اسلام آباد کے تینوں حلقوں سے متعلق کیس 24 دسمبر کے لئے مقرر کر رکھا ہے۔
گزشتہ ہفتے اسلام آباد ہائی کورٹ نے پی ٹی آئی کے امیدوار شعیب شاہین کی درخواست پر حکم امتناع جاری کیا تھا اور ان کی الیکشن پٹیشن کی حد تک ٹریبونل کو کاروائی سے روک دیا تھا