فلسطینیوں کوکوئی بھی غزہ سے بے دخل نہیں کررہا،صدرٹرمپ کایوٹرن

واشنگٹن: امریکی صدر ڈونلڈ ٹرمپ نے کہا ہے کہ فلسطینیوں کوکوئی بھی غزہ سے بے دخل نہیں کررہا۔
غیر ملکی میڈیا رپورٹس کے مطابق امریکی صدر ڈونلڈ ٹرمپ نے آئرش وزیراعظم مائیکل مارٹن کے ساتھ ملاقات کے بعد میڈیا سے گفتگو میں کہا کہ غزہ سے کسی فلسطینی کو کوئی نہیں نکال رہا، سینیٹ میں اقلیتوں کے لیڈر چک شومر پہلے یہودی تھے لیکن اب وہ مکمل فلسطینی بن چکے ہیں۔
خیال رہے کہ قبل ازیں صدرٹرمپ نے اپنے ایک بیان میں غزہ کو امریکی ملکیت میں لینے ، فلسطینیوں کو بے دخل کرنے اور غزہ کو جدید ترین اور ماڈرن بستی کے روپ میں ڈھالنے سے متعلق منصوبے کی بات کی تھی ، عالمی برادری نے ٹرمپ کے اس منصوبے کو مسترد کردیا تھا۔
یاد رہے کہ مصر، اردن اور خلیجی ممالک کی جانب سے اس طرح کے کسی بھی منصوبے پر خدشات کا اظہار کرتے ہوئے کہا گیا تھا کہ ایسا کوئی بھی منصوبہ پورے خطے کو غیرمستحکم کردے گا۔
ٹرمپ کے اس منصوبے کے جواب میں عرب ریاستوں نے غزہ کی تعمیر نو کے لیے 53 ارب ڈالر کے مصری منصوبے کی توثیق کی جس سے فلسطینیوں کو علاقے سے بے دخل ہونے سے بچایا جا سکے گا۔