اسلام آباد:وزیراعظم محمد شہباز شریف نے کہا ہے کہ دشمن کے ساتھ وہی کیا جو ایک باوقار قوم کرسکتی ہے، ہمارے جری جوانوں نے چند گھنٹوں میں دشمن کے ساتھ وہ کیا جسے دنیا یاد رکھے گی۔
وزیراعظم کے خطاب سے قبل روایتی طور پر قرآن مجید کی تلاوت کی گئی۔ جس میں سورۃ الفتح کی تلاوت کی گئی ہے۔ پھر قومی ترانہ نشر کیا گیا۔
وزیراعظم نے خطاب کے آغاز پر قوم کو مبارک باد پیش کی اور کہا کہ آپ نے اپنے اتحاد سے دنیا کو ثابت کردیا کہ آپ خوددار قوم ہیں اور مشکل وقت میں اپنی مسلح افواج کے ساتھ سیسہ پلائی دیوار بن کر کھڑے ہیں۔
انہوں نے کہا کہ بھارت نے پہلگام کا بہانہ بنا کر جنگ مسلط کی، ہم نے بلا تاخیر شفاف اور غیرجانبدارانہ تحقیقات کی پیش کش کی جبکہ بھارتی الزامات پر تحمل اور برداشت کا مظاہرہ کیا۔
وزیراعظم نے کہا کہ کہ بھارت نے اپنے گھمنڈ میں ہماری سرحدوں کی حرمت کو پامال کیا، شہریوں، مساجد، آبی ذخیروں کو نشانہ بنانے کی کوشش کی گئی۔ پھر ہم نے دشمن کو اُسی زبان میں جواب دینے کا فیصلہ کیا جو وہ بہتر سمجھتا ہے، ہم نے واضح کیا کہ جو ملاقات میز پر ہونی تھی وہ میدان جنگ میں ہوگی۔
انہوں نے کہا کہ مائیں سجدوں میں رب سے بچے مانگ کر انہیں وطن کیلیے قربان کرنے کیلیے تیار کرتی ہیں، ایسے جری سپوت شکست کے لفظ سے واقف نہیں اور ان کا مقابلہ کوئی نہیں کرسکتا، یہ پلٹنے جھپٹنے جھپٹنے پلٹنے سے واقف ہیں۔
وزیراعظم نے کہا کہ ہمارے جری جوانوں نے بھارت کو چند گھنٹوں میں ایسا سبق دکھایا کہ دنیا یاد رکھے گی، اسلحہ خانے، ہیڈ کوارٹر، توپ خانے، رافیل وغیرہ سب ناکام ہوئے۔
شہباز شریف نے کہا کہ یہ ہماری غیرت اور اصولوں کی فتح ہے، ہم نے دشمن کے ساتھ وہی کیا جو باوقار قوم کو زیب دیتا ہے، یہ فوج کے ساتھ پوری قوم کی فتح ہے، یہ عظیم لمحہ شکر ہے جس کے لیے چوبیس کروڑ عوام نے اپنے شیروں اور شاہینوں پر والہانہ محبت کے پھول برسائے، قوم افواج کے ساتھ سیسہ پلائی دیوار بن کر کھڑی ہے۔
انہوں نے کہا کہ عوام فتح کیلیے اللہ سے دعائیں کرتے رہے جس کے نتیجے میں رب نے مہربانی کی اور ہمیں شاندار فتح سے نوازا ہے، رب کا جتنا شکر ادا کریں وہ کم ہے۔
وزیراعظم نے کہا کہ میں اس تاریخی کامیابی پر جنرل ساحر شمشار مرزا، سپہ سالار جنرل سید عاصم منیر، ایئرچیف مارشل ظہیر احمد بابر، نیول چیف ایڈمرل نوید اشرف، ہر جری جوان اور افسر کو خراج تحسین و سلام پیش کرتا ہوں۔
وزیراعظم نے کہا کہ میں یہاں پر جنرل سید عاصم منیر کا اپنی اور پوری قوم کی طرف سے دل کی اتھاہ گہرائیوں سے شکریہ ادا کرتا ہوں جن کی دانشمندانہ اور دلیرانہ قیادت میں یہ عظیم معرکہ سر ہوا۔
چیف آف ایئر اسٹاف ظہیر بابر اور شاہینوں کو بڑی گرمجوشی سے شاباش دیتا ہوں جنہوں نے ہمارے سر فخر سے بلند کیے ہیں، شہید ارتضیٰ عباس ایک خوبصورت پھول تھا جو کھلنے سے پہلے مرجھا گیا۔
وزیراعظم نے تمام سیاسی ، پارلیمانی جماعتوں، صدر ن لیگ، صدر مملکت، صحافیوں، سوشل میڈیا صارفین کا شکریہ ادا کیا۔ شہباز شریف نے کہا کہ سوشل میڈیا اور صحافیوں نے بھارت کی جعلی خبروں کا مقابلہ کیا اور جھوٹ کو بے نقاب کیا۔
اس کے بعد ہم سب ملکر اپنی توانائیاں ملک کیلیے وقف کریں گے اور اتنی محنت کریں گے کہ پاکستان اقوام عالم میں اپنا کھویا ہوا مقام حاصل نہ کرلے۔ ہم اتنی ترقی حاصل کریں کہ جیسے ہماری عسکری قوت نے دنیا کو دنگ کر کے رکھ دیا ہے۔
وزیراعظم نے ترکیہ، سعودی عرب، چین، یو اے ای، قطر، اقوام متحدہ سمیت دیگر ممالک کا جنگ بندی کیلیے کردار ادا کرنے پر شکریہ ادا کیا۔ شہباز شریف نے محمد بن سلمان، امیر قطر، امیر یو اے ای، چینی صدر کا نام لے کر خصوصی شکریہ بھی ادا کیا۔
