دوشنبے:وزیر اعظم محمد شہباز شریف نے بلوچستان میں بھارتی سرپرستی میں پاکستان میں شر انگیزی پھیلانے والے فتنہ الہندوستان کے پانچ دہشتگردوں کو جہنم واصل کرنے پر سیکیورٹی فورسز کوخراج تحسین پیش کیاہے۔
ایک بیان میں وزیراعظم شہبازشریف نے لورالائی میں 4 دہشتگردوں، جو بلوچستان میں بد امنی پھیلانے کے مختلف واقعات بالخصوص این-70 میں 30 معصوم لوگوں کی شہادت کے ذمہ داران میں شامل تھے کو جہنم رسید کرنے پر سیکیورٹی فورسز کی پیشہ ورانہ صلاحیتوں کوسراہا۔
وزیرِ اعظم نے ضلع کیچ میں بھارتی سرپرستی میں پاکستان میں دہشتگردی پھیلانے والے مزید ایک دہشتگرد کو جہنم واصل کرنے پر افواج پاکستان کے افسران و جوانوں کی پذیرائی کرتے ہوئے کہا کہ پاکستان میں بھارتی پراکسیوں کے دہشتگردوں کے مکمل خاتمے کیلئے افواج پاکستان شب روز مصروف عمل ہیں۔
وزیراعظم نے کہا کہ دہشتگردی کے خلاف جنگ میں پوری قوم اپنی افواج پاکستان کے شانہ بشانہ کھڑی ہے۔
