سعودی حکومت حج انتظامات میں ہر سال جدت اور نئی سہولیات متعارف کروا رہی ہے پاکستانی حجاج کے لیے سعودی وزیر حج کی خصوصی توجہ باعث مسرت ہے،سرداریوسف

جدہ:وفاقی وزیر مذہبی امور سردار محمد یوسف نے سعودی وزیر حج و عمرہ ڈاکٹر توفیق بن فوزان الربیعہ سے جدہ میں ملاقات کی۔ملاقات میں حج 2025 کے انتظامات پر تبادلہ خیال کیا گیا۔سردار محمد یوسف نے پاکستانی عازمین حج کیلئے بہترین سہولیات پر سعودی وزیر حج کا شکریہ ادا کیا۔

وفاقی وزیر سردار محمد یوسف نے کہا کہ پاکستانی حجاج کی سہولت کے لیے سعودی وزیر حج کی خصوصی توجہ باعث مسرت ہے، سعودی حکومت حج انتظامات میں ہر سال جدت اور نئی سہولیات متعارف کروا رہی ہےپاکستانی عازمین حج کو کھانے، ٹرانسپورٹ اور رہائش کی بہترین سہولیات فراہم کی جارہی ہیں۔انہوں نے مزید کہا کہ اس سال مشاعر مقدسہ میں پاکستانی حجاج کو نزدیکی مکاتب فراہم کیے گئے ہیں۔آئندہ حج کیلئے روڈ ٹو مکہ پروجیکٹ کا دائرہ کار پاکستان کے دیگر شہروں تک بڑھائیں گے۔
سعودی وزیر ڈاکٹر توفیق الربیعہ نے کہا کہ سعودی وزارت حج زائرین کو ڈیجیٹل سسٹم کے ذریعے سہولتوں کی فراہمی کو بہتر بنانے کیلئے کوشاں ہے۔منی اور عرفات میں پاکستانی عازمین حج کو بہترین سہولیات فراہم کی جائیں گی۔
انہوں نے کہا کہ مشاعر مقدسہ میں بہتر سہولیات کو یقینی بنانے کے لیے نجی کمپنیوں کی حوصلہ افزائی کر رہے ہیں اور پا کستان سے حجاج کی بڑی تعداد اور ان کی خدمت کرنا باعث شرف ہے۔