گلگت:دیامر بھاشا ڈیم پراجیکٹ کی تعمیراتی سرگرمیوں کےلیے درکار بجلی کی فراہمی کےلیے مین ڈیم سائٹ پر ہیوی فرنس آئل یونٹس (ایچ ایف او ) کو فعال کردیاگیا ہے۔
ترجمان دیامر بھاشا ڈیم کے مطابق تقریبا 56 میگاواٹ کے حامل اس پلانٹ میں پہلے مرحلے میں چار ہیوی آئل جنریٹرزکو فعال کیا گیا ہے، ہر یونٹ 8.4میگاواٹ بجلی پیدا کرے گا۔اسطرح دوسرے فیز میں مزید 2یونٹس کو نصب کیا جائے گا، مجموعی طور پر کل چھ یونٹس سے 50.4 میگا واٹ بجلی پیدا کی جائے گی۔ علاوہ ازیں پانچ ڈیزل جنریٹرز کے ذریعے 1.1میگاواٹ بجلی پیدا کی جائے گی، مجموعی طور پر کل 55.9 میگاواٹ بجلی پیدا ہوگی جو کہ ڈیم کی تعمیراتی سرگرمیوں کو درکار ہوگی۔
خیال رہے کہ دیامر بھاشا ڈیم کی مختلف سائٹس پر دن رات تعمیراتی سرگرمیاں جاری ہیں۔ دیامر بھاشا ڈیم میں پانی ذخیرہ کرنے کی صلاحیت 8.1ملین ایکڑفٹ ہے جس سے 12لاکھ 30ہزار ایکڑ اراضی زیرکاشت آئے گی۔ دیامربھاشا ڈیم کی بجلی پیدا کرنے کی صلاحیت 4ہزار 500میگاواٹ ہے جس سے قومی نظام کو سالانہ 18 ارب یونٹس سستی اور ماحول دوست پن بجلی میسر آئے گی۔
