سوات:ریسکیو 1122 کی جانب سے سیلابی ریلے میں بہہ جانے والے افراد کی تلاش کے لیے سرچ آپریشن جاری ہے۔ ڈسٹرکٹ ایمرجنسی آفیسر رفیع اللہ مروت کے مطابق ریسکیو 1122 کی مختلف ٹیمیں دریائے سوات میں لاپتہ افراد کو تلاش کرنے میں مصروف ہیں۔
رفیع اللہ مروت نے بتایا کہ سیلابی ریلے میں مجموعی طور پر 13 افراد بہہ گئے تھے، جن میں سے 11 افراد کے جسد خاکی نکالے جا چکے ہیں، جبکہ دو افراد تاحال لاپتہ ہیں جن کی تلاش جاری ہے۔
انہوں نے مزید بتایا کہ جاں بحق اور لاپتہ افراد کا تعلق سیالکوٹ، ڈسکہ اور مردان سے ہے۔ ریسکیو 1122 کے 60 اہلکار اس وقت سرچ آپریشن میں حصہ لے رہے ہیں، جن میں غوطہ خور، فیلڈ ریسپانڈر اور سپورٹ ٹیمیں شامل ہیں۔
ریسکیو حکام کے مطابق سرچ آپریشن اس وقت تک جاری رہے گا جب تک لاپتہ تمام افراد کو تلاش نہیں کر لیا جاتا۔
