راولپنڈی :پنجاب میں حالیہ شدید بارشوں کے باعث متعدد علاقوں میں سیلابی صورتحال پیدا ہو گئی ہے جس سے عوام کو شدید مشکلات کا سامنا ہے۔ اس صورتحال میں پاک فوج نے عوام کی مدد کے لیے ایک بار پھر اپنے فرائض بخوبی ادا کرتے ہوئے چکری روڈ پر سیلاب میں پھنسے ایک خاندان کو ہیلی کاپٹر کے ذریعے ریسکیو کر لیا۔
متاثرہ خاندان گاؤں لڈیان میں اپنے مکان کی چھت پر پناہ لیے بیٹھا تھا جہاں سے انہیں فوری طور پر محفوظ مقام پر منتقل کیا گیا۔ خراب موسمی حالات کے باوجود پاک فوج کا ہیلی ریسکیو مشن کامیابی سے مکمل ہوا اور شدید سیلاب میں گھرے تینوں افراد کی زندگیاں بچا لی گئیں۔
پاک فوج کی جانب سے عوام کی مدد اور حفاظت کے لیے جاری یہ کوششیں متاثرین کے لیے امید کی کرن ثابت ہو رہی ہیں۔
