بیجنگ:چین کے دارالحکومت بیجنگ میں BOAO گلوبل ہیلتھ کانفرنس کے تحت یونیورسل ہیلتھ کئیر پر ایک عالمی مکالمے کا انعقاد کیا گیا، جس میں دنیا بھر کے وزرائے صحت اور صحت عامہ کے ماہرین نے شرکت کی۔
پاکستان کی نمائندگی وفاقی وزیرِ صحت سید مصطفیٰ کمال نے کی، جنہوں نے گول میز مباحثے میں مساوی صحت کی سہولیات، صحت کے بنیادی اسباب اور نظامِ صحت میں پائیدار اصلاحات پر اپنا موقف پیش کیا۔
وفاقی وزیر نے کہا کہ صحت کے نظام میں بہتری صرف سہولیات سے نہیں، بلکہ اُن اسباب پر قابو پانے سے آتی ہے جو بیماری کو جنم دیتے ہیں۔انہوں نے مزید کہا کہ اگر ہم صحت کی جڑ پر قابو پانے میں کامیاب ہو جائیں تو ہم نہ صرف آج بلکہ آنے والے کل کو بھی محفوظ بنا سکتے ہیں۔
سید مصطفیٰ کمال کا کہنا تھا کہ کامن سینس اور عالمی تجربات کے تبادلے سے صحت کے نظام میں حقیقی اور پائیدار تبدیلی ممکن ہے۔ انہوں نے کہا کہ پاکستان مساوی صحت تک رسائی کے عالمی وژن کی مکمل حمایت کرتا ہے۔
